「o靚」模經濟學

「o靚」模經濟學 - 文：馬家輝

「o靚」模近年頻頻出擊而又有 job 可接，據說理由之一是，夠平，平到三幾千即有交易，可以找她們出席任何宣傳活動，而有其童顏巨乳之處，必有攝影機嚓嚓地閃動不休，隔兩日亦必有報可見。

保證收視，回報率高，在經濟學原則下，當然長食長有。

喂，有數得計。有宣傳活動，求其搵位二線姐仔低胸出席，貴則五萬，平則兩萬；若想搵位一線模特兒，沒有六位數字是請不動的，即使來了，亦只能佔據半個版位，遠遠比不上「o靚」模在活動典禮上輕輕講幾句無厘頭是非即動輒有一兩日的版面跟進。以價論價，實在抵搵。

再者，「o靚」模所代言推廣的商品以電子遊戲相關用品居多，這類物件的主要消費者正是那些頭戴高 cap、身穿 t-shirt、腿懸三個骨褲的未老先衰電車男或電車佬，他們一見到「o靚」模，兩隻眼核即刻放光，商品形象馬上入腦，宣傳效果遠比找那些年過卅的所謂名模或超模強得多，如同替廿萬一隻的手表做廣告，沒人會考慮找「o靚」模，各有各的市場，誰都沒資格瞧不起誰。資深模特兒偶爾口出惡言批評「o靚」模不夠專業，如果不是希望獨霸市場，便是妒忌，沒有其他。

甚至退一步說，時代輪替本來就愈來愈快，金融危機便是好例子，昔日是十年一個大風浪，其後是五年，再其後是三年，如今幾乎每年都有一兩個可以把投機人士拋得頭昏腦脹的高低股浪，景氣循環周期愈縮愈短，腳步稍慢者必跟不上。娛樂人物的輪替亦正如此，「o靚」模雖然奪不走超模的市場，但時代焦點暫時以其最熱，屬於正常現象，反正再熱的風潮亦沒法長久，日日在報上看見那幾副「o靚」模面孔必會生厭，終須有日必再輪到超模做莊，等著就是了，----- 怕就怕當風向轉回自己的時候，自己已經老了。

「o靚」模熱潮一旦啟動了，往後有待開拓的地方還多呢。會不會出現「「o靚」模旅行團」？曼谷五日四夜，收費五千八，由六個「o靚」模隨團出發，陪食陪唱陪游水，豈不快哉？「o靚」模 K局、「o靚」模飯局、「o靚」模雀局……各類服務應有盡有，蔭權五年，特區盛世，無得頂。